ရေထဲတွင် လေ့ကျင့်ခန်းလုပ်ခြင်း (Aquatic Exercise / Hydrotherapy) သည် အဆစ်နာကျင်ခြင်းကို သက်သာစေရန် ထိရောက်ပြီး ဘေးကင်းလုံခြုံတဲ့ နည်းလမ်းတစ်ခု ဖြစ်ပါတယ်။ ရေရဲ့ သဘာဝဂုဏ်သတ္တိများဖြစ်တဲ့ ပေါ့ပါးမှု (Buoyancy)၊ ခုခံမှု (Resistance) နဲ့ နွေးထွေးမှု (Warmth) တို့သည် အဆစ်များပေါ်ရှိ ဖိအားကို လျှော့ချပေးပြီး ကြွက်သားများကို သန်မာစေကာ နာကျင်မှုကို သက်သာစေနိုင်ပါတယ်။
ရေထဲတွင် လေ့ကျင့်ခန်းလုပ်ခြင်းဟာ အထူးသဖြင့် အရိုးအဆစ်ရောင်ရမ်းခြင်း (Osteoarthritis)၊ အဆစ်အမြစ်ကိုက်ခဲခြင်းနဲ့ နာတာရှည် အဆစ်နာကျင်ခြင်းတို့အတွက် အထူးအကျိုးရှိပါတယ်။ ရေရဲ့ ပေါ့ပါးမှုက ခန္ဓာကိုယ်အလေးချိန်ရဲ့ (၉၀%) အထိကို ပင့်တင်သယ်ဆောင်ပေးထားနိုင်တဲ့အတွက် အဆစ်များကို သက်သာစေပြီး နာကျင်မှုမရှိဘဲ လွတ်လွတ်လပ်လပ် လှုပ်ရှားနိုင်စေပါတယ်။
သုတေသနပြုချက်များအရ ရေထဲတွင် လေ့ကျင့်ခန်းလုပ်ခြင်းဟာ အဆစ်နာကျင်မှုကို (၂၂.၅%) အထိ လျှော့ချပေးနိုင်ပြီး အဆစ်များ၏ လုပ်ဆောင်နိုင်စွမ်းကို (၁၆.၇%) အထိ တိုးတက်စေနိုင်ကြောင်း တွေ့ရှိရပါတယ်။
ရေထဲတွင် လေ့ကျင့်ခန်းလုပ်ခြင်းရဲ့ အကျိုးကျေးဇူးများ
- ဖိအားလျော့ကျစေခြင်း – ရေရဲ့ပေါ့ပါးမှုဟာ ခန္ဓာကိုယ်အလေးချိန်ကို ပင့်တင်ပေးထားတဲ့အတွက် ဒူး၊ တင်ပါးနဲ့ ကျောရိုးအဆစ်များပေါ် သက်ရောက်နေတဲ့ ဖိအားကို သိသိသာသာ လျှော့ချပေးပါတယ်။
- ကြွက်သားသန်မာစေခြင်း – ရေရဲ့ခုခံမှုဟာ ကြွက်သားများကို ပုံမှန်ထက် ပိုမိုအားစိုက်ရစေတဲ့အတွက် အလေးမစရာမလိုဘဲ ကြွက်သားများကို သန်မာစေပါတယ်။ သုတေသနတစ်ခုအရ ရေလေ့ကျင့်ခန်းဟာ ဒူးဆစ်ကွေးညွှတ်နိုင်မှုနဲ့ ဆန့်ထုတ်နိုင်စွမ်းတို့ကို သိသိသာသာ တိုးတက်စေကြောင်း တွေ့ရှိရပါတယ်။
- နာကျင်မှုသက်သာစေခြင်း – ရေနွေးနွေးလေးသည် ကြွက်သားများကို ဖြေလျှော့ပေးပြီး သွေးလည်ပတ်မှုကို ကောင်းမွန်စေကာ ခန္ဓာကိုယ်ရဲ့ သဘာဝ နာကျင်မှုသက်သာစေသော ဓာတ်များ (Endorphins) ထုတ်လွှတ်မှုကို လှုံ့ဆော်ပေးပါတယ်။
- ပြုတ်ကျနိုင်ခြေနည်းပါးခြင်း – ရေထဲတွင် လေ့ကျင့်ခန်းလုပ်ခြင်းသည် ဟန်ချက်ထိန်းနိုင်စွမ်းကို မြှင့်တင်ပေးပါတယ်။ ရေရဲ့ ဝန်းရံထောက်ကူမှုကြောင့် ပြုတ်ကျခြင်းနဲ့ ဒဏ်ရာရနိုင်ခြေကို လျှော့ချပေးနိုင်တာကြောင့် အထူးသဖြင့် သက်ကြီးရွယ်အိုများနှင့် လှုပ်ရှားမှုအကန့်အသတ်ရှိသူများအတွက် အထူးသင့်တော်ပါတယ်။
ရေထဲတွင် လုပ်ဆောင်နိုင်သော လေ့ကျင့်ခန်းအမျိုးအစားများ
- ရေထဲ၌ ပုံမှန်လမ်းလျှောက်ပေးခြင်းဟာ ခုခံမှုကို တိုးစေပြီး ကြွက်သားများကို သန်မာစေပါတယ်။
- ကြွက်သားများ ပျော့ပြောင်းစေရန် ရေထဲတွင် အကြောဆန့်လေ့ကျင့်ခန်းများ (Stretching) ပြုလုပ်ပေးပါ။
- တင်ပါးနဲ့ ခြေထောက်ကြွက်သားများကို သန်မာစေရန် ရေရဲ့ခုခံမှုကို အသုံးပြု၍ ခြေထောက်မြှောက်လေ့ကျင့်ခန်း (Leg Raises) များ ပြုလုပ်ပါ။
- အဆစ်အမြစ်များ လှုပ်ရှားနိုင်စွမ်း (Range of Motion) ကောင်းမွန်စေရန် ရေထဲတွင် လက်နှင့်ခြေလှည့် လေ့ကျင့်ခန်း (Joint Rotations) များ ပြုလုပ်ပေးပါ။
ရေလေ့ကျင့်ခန်း စတင်ရန် အကြံပြုချက်များ
- မည်သည့် လေ့ကျင့်ခန်းအစီအစဉ်ကိုမဆို မစတင်မီ မိမိပြသနေကျ ဆရာဝန်နှင့် ဦးစွာ တိုင်ပင်ဆွေးနွေးပါ။
- ခါးမှ ရင်ဘတ်အထိရှိသော ရေအနက်သည် စတင်ရန် အသင့်တော်ဆုံးဖြစ်ပြီး ခန္ဓာကိုယ်အတွက် ထောက်ကူမှုနှင့် ခုခံမှုကို မျှတစေပါတယ်။
- ရေထဲတွင် မိနစ်အနည်းငယ် လမ်းလျှောက်ခြင်းဖြင့် စတင်ပြီးမှသာ တဖြည်းဖြည်း ပြင်းထန်မှုနှင့် အချိန်ကို တိုးမြှင့်သွားပါ။
- ရေအပူချိန် (၃၄°C) မှ (၃၆°C) ကြားဟာ ကြွက်သားများကို ဖြေလျှော့ရန်နှင့် သွေးလည်ပတ်မှုကောင်းမွန်ရန် အကောင်းဆုံးဖြစ်ပါတယ်။ အလွန်ပူသောရေသည် နှလုံးကျန်းမာရေးကို ထိခိုက်နိုင်သောကြောင့် ရှောင်ကြဉ်ပါ။
- ရေထဲတွင် လေ့ကျင့်ခန်းလုပ်နေချိန်၌လည်း ချွေးထွက်ပြီး ရေဓာတ်ခန်းခြောက်နိုင်သောကြောင့် ရေသောက်ရန် မမေ့ပါနှင့်။
သတိပေးချက်: ဤဘလော့ဂ်သည် Grace Win ၏ ပြည်သူ့ကျန်းမာရေး အသိပညာပေး အစီအစဉ်တစ်ခု ဖြစ်ပါသည်။ ဖော်ပြထားသော အကြောင်းအရာများသည် ပညာပေး ရည်ရွယ်ချက်အတွက်သာ ဖြစ်ပြီး ဆေးဘက်ဆိုင်ရာ အကြံပြုချက်၊ ရောဂါရှာဖွေခြင်း သို့မဟုတ် ကုသမှုကို အစားထိုးရန် မရည်ရွယ်ပါ။ ကျန်းမာရေးဆိုင်ရာ ပြဿနာများအတွက် ကျွမ်းကျင်သော ကျန်းမာရေးစောင့်ရှောက်မှု ပညာရှင်နှင့် တိုင်ပင်ဆွေးနွေးပါ။