ဓာတ်လှေကားအစား လှေခါးကိုသုံးခြင်းဟာ နေ့စဉ်ဘဝမှာ ရိုးရှင်းပြီး ကုန်ကျစရိတ်မရှိတဲ့ ကိုယ်လက်လှုပ်ရှားမှုတစ်ခု ဖြစ်ကာ နှလုံးကျန်းမာရေးနဲ့ သက်ရှည်ကျန်းမာခြင်းအတွက် သိသိသာသာ အကျိုးကျေးဇူးများကို ပေးစွမ်းနိုင်ပါတယ်။ တစ်နေ့တာအတွင်း ဒီလိုတိုတောင်းတဲ့ လှုပ်ရှားမှုလေးတွေကို ပေါင်းစပ်လုပ်ဆောင်ပေးခြင်းဖြင့် ကျန်းမာရေးအကျိုးကျေးဇူးများကို ရရှိစေမှာပါ။
လေ့လာမှုများအရ ပုံမှန်လှေခါးတက်ခြင်းဟာ နှလုံးရောဂါကြောင့် သေဆုံးနိုင်ခြေကို (၃၉%) အထိ လျှော့ချပေးနိုင်ပြီး မည်သည့်အကြောင်းကြောင့်မဆို သေဆုံးနိုင်ခြေကို (၂၄%) အထိ လျှော့ချပေးနိုင်ကြောင်း တွေ့ရှိရပါတယ်။ ဒီလိုအကျိုးကျေးဇူးများ ရရှိရခြင်းဟာ လှေခါးတက်ခြင်းက ခြေထောက်နဲ့ တင်ပါးကြွက်သားများကို အဓိကအသုံးပြုရပြီး နှလုံးခုန်နှုန်းကို မြှင့်တင်ပေးကာ နှလုံးသွေးကြောဆိုင်ရာ ကြံ့ခိုင်မှု (Cardiorespiratory Fitness) ကို တိုးတက်စေသောကြောင့် ဖြစ်ပါတယ်။
လှေခါးတက်ခြင်းရဲ့ ကျန်းမာရေးအကျိုးကျေးဇူးများ
- ပုံမှန်လှေခါးတက်သူများဟာ ဓာတ်လှေကားသုံးသူများထက် နှလုံးရောဂါကြောင့် သေဆုံးနိုင်ခြေ (၃၉%) လျော့နည်းပြီး နှလုံးဖောက်ခြင်း၊ နှလုံးအားနည်းခြင်းနဲ့ လေဖြတ်ခြင်းအန္တရာယ်တို့ကိုလည်း ကျဆင်းစေပါတယ်။
- လှေခါးတက်ခြင်း အလေ့အကျင့်ရှိသူများဟာ မည်သည့်အကြောင်းကြောင့်မဆို သေဆုံးနိုင်ခြေ (၂၄%) လျော့နည်းကြောင်း သုတေသနပြုချက်များအရ သိရပါတယ်။
- လေ့လာမှုတစ်ခုအရ လှေခါးတက်ခြင်းဟာ ခါးပတ်လည်တိုင်းထွာချက်၊ ကိုယ်အလေးချိန်၊ အဆီထု၊ သွေးပေါင်ချိန်နှင့် LDL (မကောင်းသော) ကိုလက်စထရောတို့ကို သိသိသာသာ လျှော့ချပေးနိုင်ကြောင်း တွေ့ရှိရပါတယ်။
- (၁၂) ပတ်ကြာ ပုံမှန်လှေခါးတက်ခြင်းဟာ ခန္ဓာကိုယ်ရဲ့ အေရိုးဗစ်စွမ်းရည် (Maximal Aerobic Capacity) ကို (၉.၂%) အထိ တိုးတက်စေနိုင်ပါတယ်။
- လှေခါးတက်ခြင်းအပါအဝင် ကိုယ်လက်လှုပ်ရှားမှုလုပ်ခြင်းဟာ Endorphins ဟုခေါ်တဲ့ ပျော်ရွှင်စေတဲ့ ဓာတုပစ္စည်းများကို ထုတ်လွှတ်ပေးတာကြောင့် စိတ်ဖိစီးမှုကို လျှော့ချပေးကာ စိတ်ခံစားချက်ကို ပိုမိုကောင်းမွန်စေပါတယ်။
လှေခါးတက်ခြင်းကို နေ့စဉ်ဘဝတွင် ထည့်သွင်းရန် အကြံပြုချက်များ
- အလုပ်ခွင်များတွင်လည်း ဓာတ်လှေကားအစား လှေခါးအသုံးပြုရန် တိုက်တွန်းအားပေးသင့်ပါတယ်။
- အိမ်မှာရှိတဲ့ လှေခါးများကိုလည်း အခွင့်အရေးရသလို မိနစ်အနည်းငယ်ကြာ အကြိမ်များစွာ တက်ပေးပါ။
- ဓာတ်လှေကား သို့မဟုတ် စက်လှေခါးအစား ပုံမှန်လှေခါးကို အသုံးပြုရန် သတိရပါ။
- လှေခါးတက်ခြင်းကို အခုမှစတင်သူဖြစ်ပါက တစ်ထပ် သို့မဟုတ် နှစ်ထပ်ဖြင့်သာ စတင်ပြီး တဖြည်းဖြည်းချင်း တိုးမြှင့်ပါ။ တစ်နေ့လျှင် လှေခါး (၆) ထပ်ခန့် တက်ပေးခြင်းသည် သိသာထင်ရှားသော ကျန်းမာရေးအကျိုးကျေးဇူးများကို ရရှိစေနိုင်သည်ဟု အချို့သုတေသနများက အကြံပြုထားပါတယ်။
သတိပြုရမည့်အချက်များ
- လှေခါးများရဲ့ အခြေအနေကိုလည်း သတိပြုပါ။ မညီညာသော လှေခါးထစ်များ၊ အလင်းရောင်အားနည်းခြင်း သို့မဟုတ် လက်ရန်းမရှိခြင်းတို့သည် ပြုတ်ကျနိုင်ခြေကို တိုးမြှင့်စေနိုင်ပါတယ်။
- လှေခါးတက်ခြင်းသည် အကျိုးရှိသော်လည်း ၎င်းတစ်ခုတည်းဖြင့် နေ့စဉ်လိုအပ်သော ကိုယ်လက်လှုပ်ရှားမှုအားလုံးကို အစားထိုး၍မရပါ။
- လမ်းလျှောက်ခြင်း၊ စက်ဘီးစီးခြင်းစသည့် အခြား ကိုယ်လက်လှုပ်ရှားမှုများနှင့်လည်း ပေါင်းစပ်လုပ်ဆောင်သင့်ပါတယ်။
ကိုးကားချက်များ
– HealthDay News. (2024, April 26). Take the Stairs & Step Up to Longer Life
– University of East Anglia. (2024, April 26)Choosing the stairs can reduce your risk of heart disease Cited in .
သတိပေးချက်: ဤဘလော့ဂ်သည် Grace Win ၏ ပြည်သူ့ကျန်းမာရေး အသိပညာပေး အစီအစဉ်တစ်ခု ဖြစ်ပါသည်။ ဖော်ပြထားသော အကြောင်းအရာများသည် ပညာပေး ရည်ရွယ်ချက်အတွက်သာ ဖြစ်ပြီး ဆေးဘက်ဆိုင်ရာ အကြံပြုချက်၊ ရောဂါရှာဖွေခြင်း သို့မဟုတ် ကုသမှုကို အစားထိုးရန် မရည်ရွယ်ပါ။ ကျန်းမာရေးဆိုင်ရာ ပြဿနာများအတွက် ကျွမ်းကျင်သော ကျန်းမာရေးစောင့်ရှောက်မှု ပညာရှင်နှင့် တိုင်ပင်ဆွေးနွေးပါ။