ဝှေးစေ့ကျန်းမာရေးသည် အမျိုးသားများ၏ မျိုးပွားနိုင်စွမ်းနှင့် အထွေထွေကျန်းမာရေးအတွက် အလွန်အရေးကြီးပါသည်။ အထူးသဖြင့် အသက် (၁၅) နှစ်မှ (၃၅) နှစ်အတွင်းရှိ အမျိုးသားများတွင် ဝှေးစေ့ကင်ဆာ ဖြစ်ပွားမှု အများဆုံးဖြစ်တတ်ပါသည်။
မိမိကိုယ်တိုင် မည်သို့ စစ်ဆေးမည်နည်း ဝှေးစေ့ကျန်းမာရေးကို မိမိကိုယ်တိုင် အလွယ်တကူ စစ်ဆေးနိုင်ပြီး၊ အကောင်းဆုံးအချိန်မှာ ရေနွေးဖြင့် ရေချိုးပြီးကာစအချိန်ပင် ဖြစ်ပါသည်။ ဤအချိန်သည် ဝှေးစေ့ကို ဖုံးအုပ်ထားသော ကပ်ပယ်အိတ်အရေပြား အလျော့ရဲဆုံးအချိန်ဖြစ်သောကြောင့် ဝှေးစေ့များကို စမ်းသပ်ရန် အလွယ်ကူဆုံး ဖြစ်ပါသည်။
- လက်နှစ်ဖက်လုံးကို အသုံးပြုပြီး ဝှေးစေ့တစ်လုံးချင်းစီကို အနည်းငယ်ဖိ၍ လက်ချောင်းများကြားတွင် ညင်သာစွာ လှိမ့်ကာ စမ်းသပ်ပါ။
- လက်မကို ဝှေးစေ့ထိပ်တွင်ထားပြီး လက်ညှိုးနှင့် လက်ခလယ်တို့ကို ဝှေးစေ့အနောက်ဘက်တွင်ထား၍ လှိမ့်ပေးပါ။
- ဤသို့ စမ်းသပ်သည့်အခါ ဝှေးစေ့တစ်လုံးချင်းစီ၏ အနောက်ဘက်ထိပ်ပိုင်းတွင် ခပ်ပျော့ပျော့ ကြိုးသဏ္ဌာန်ရှိပြီး ဖိလိုက်လျှင် အနည်းငယ်နာနိုင်သည့် သုက်ပို့ပြွန် (Epididymis) ကို စမ်းမိမည် ဖြစ်ပါသည်။
(မှတ်ချက် – ဝှေးစေ့တစ်လုံးသည် အခြားဝှေးစေ့တစ်လုံးထက် အနည်းငယ် ကြီးနေတတ်သည်ကို သတိပြုရန် လိုအပ်ပါသည်။ များသောအားဖြင့် ညာဘက်ဝှေးစေ့က ဘယ်ဘက်ဝှေးစေ့ထက် ပိုကြီးနေတတ်ပြီး ယင်းမှာ ပုံမှန်သာဖြစ်သည့်အတွက် စိုးရိမ်စရာ မရှိပါ။)
ဝှေးစေ့ကျန်းမာရေးအတွက် နေထိုင်မှုပုံစံ
- အကာအကွယ် ဝတ်ဆင်ပါ – အားကစားလုပ်ရာတွင် သို့မဟုတ် ထိခိုက်ဒဏ်ရာရနိုင်သော အလုပ်များလုပ်ရာတွင် အကာအကွယ် (Athletic Cup) ကို ဝတ်ဆင်ပါ။
- ချောင်ချိသော အတွင်းခံကို ရွေးချယ်ပါ – အလွန်ကျပ်လွန်းသော အတွင်းခံများသည် အပူချိန်ကို မြင့်တက်စေပြီး သုက်ပိုးထုတ်လုပ်မှုကို ထိခိုက်စေနိုင်သဖြင့် လေဝင်လေထွက်ကောင်းပြီး ချောင်ချိသော အတွင်းခံများကိုသာ ရွေးချယ်ဝတ်ဆင်ပါ။
- ပုံမှန် စစ်ဆေးပါ – တစ်လလျှင် တစ်ကြိမ်ခန့် မိမိကိုယ်တိုင် ပုံမှန်စမ်းသပ်စစ်ဆေးသည့် အလေ့အကျင့် ပြုလုပ်ပါ။
ဆရာဝန်နှင့် ချက်ချင်းပြသရမည့် လက္ခဏာများ စမ်းသပ်စစ်ဆေးစဉ် အောက်ပါလက္ခဏာများထဲမှ တစ်ခုခုကို တွေ့ရှိပါက ဆရာဝန်နှင့် ချက်ချင်း သွားရောက်ပြသဆွေးနွေးရပါမည်-
- ဝှေးစေ့တွင် နာကျင်မှုမရှိသော အဖုအကျိတ် (သို့မဟုတ်) မာခဲနေသော အစိတ်အပိုင်းတစ်ခုခုကို စမ်းမိခြင်း။
- ကပ်ပယ်အိတ် (သို့မဟုတ်) ဝှေးစေ့ သိသိသာသာ ရောင်ရမ်းလာခြင်း၊ ကြီးထွားလာခြင်း (သို့မဟုတ်) ပုံမှန်မဟုတ်ဘဲ ပြောင်းလဲလာခြင်း။
- ကပ်ပယ်အိတ် (သို့မဟုတ်) ဆီးစပ်တစ်ဝိုက်တွင် ဆွဲဆန့်ထားသကဲ့သို့ လေးလံမှုကို ခံစားရခြင်း။
- ဝှေးစေ့ (သို့မဟုတ်) ကပ်ပယ်အိတ်အတွင်း အကြောင်းရင်းမရှိဘဲ စူးရှစွာ နာကျင်ခြင်း။
သတိပေးချက်: ဤဘလော့ဂ်သည် Grace Win ၏ ပြည်သူ့ကျန်းမာရေး အသိပညာပေး အစီအစဉ်တစ်ခု ဖြစ်ပါသည်။ ဖော်ပြထားသော အကြောင်းအရာများသည် ပညာပေး ရည်ရွယ်ချက်အတွက်သာ ဖြစ်ပြီး ဆေးဘက်ဆိုင်ရာ အကြံပြုချက်၊ ရောဂါရှာဖွေခြင်း သို့မဟုတ် ကုသမှုကို အစားထိုးရန် မရည်ရွယ်ပါ။ ကျန်းမာရေးဆိုင်ရာ ပြဿနာများအတွက် ကျွမ်းကျင်သော ကျန်းမာရေးစောင့်ရှောက်မှု ပညာရှင်နှင့် တိုင်ပင်ဆွေးနွေးပါ။